Salmo 119:105       

LANTÈRNA                         

Dr. Marlon Winedt                         

120. Stephen Hawking a laga sa ku nos no mester di Dios!

            Ken ta Stephen Hawking?  Stephen Hawking ta un di e hòmbernan mas sabí na mundu. E tabata profesor di matemátika i físika na Universidad di Cambridge kaminda el a okupá e katedrá famoso ku Sir Isaac Newton, famoso tata di físika moderno, tambe a okupá. Hawking a traha hopi riba e asuntu di “burakunan pretu” (black hole)  i ta konosí pa su buki “A brief History of Time”. Tambe su aparensia ta impaktábo; pa motibu di un malesa di su sentro nervosio i muskulonan; e ta den ròlstul i ta papia via di un aparato ku ta modulá su bos. 

            Pa dekadanan kaba Hawking ta hasi uso di e palabra “Dios” den su eskrito i charlanan, kaminda e ta mustra riba un tipo di Kreador den un sentido kósmiko. Klaro ku semper el a mustra ariba ku e no ta un hòmber religioso òf  spiritual den e sentido tradishonal di e palabra. Tambe hopi be e tabata referí na “Dios” den forma metafóriko, esta “na manera di bisa”.  Den dekada di añanan ochenta, Papa Huan Pablo II a  tene un konferensia na Vaticano ku diferente sientífiko. Hawking tambe tabatei i ta konosí ku regularmente tin konferensianan ku sientífikonan Kristian i no Kristian na diferente lugá. Siensia i religion no ta awa ku kandela, pero dos parti igual i importante di hende su konosementu i bida. Diálogo entre hende di fe i hende di siensia ta masha importante; tin diferente forma di integrá siensia i fe.

            Awor ta asina ku nèt den e último dianan aki, Hawking a bolbe bini den notisia, pasobra el a deklará ku segun su kalkulashonnan i sierto teoría, no ta nesesario pa tin Dios Kreador, ya ku mundu por a kuminsá di nos mes. Interesante ta ku un sientífiko ta sali for di su kampo di investigashon, hasi deklarashonnan religioso i filosófiko i tur hende ta ariba abou!  Nos sa ku tin hopi ateista den mundu i tin sientifikonan ateista i sientíkonan kreyente. Mester evitá di hasi manera fe i eksistensia di Dios ta kompetensia di siensianan natural i di matemátika. Pa sabí i genial ku Hawkings ta, su pensamentu riba Dios ta un konklushon filósofiko; ta algu ku e ta kere aden! Imanuel Kant (1724-1804), e gran filósofo aleman, a bisa ku asuntunan di fe i  (no) eksistensia di Dios no ta kompetensia di siensia. Tin hopi  ku ta kere i tin hopi ku no ta kere!

         

   Laga nos kòrda ku Hawking a kambia di idea riba diferente di su teorianan tokante kosmos, segun tempu ta bai, manera kualke bon sientífiko ta hasi ora e deskubrí òf  reinterpretá sierto datonan.  Tin speransa! Por lo pronto, no laga niun hende kore kumpra ka’i morto i kèlder pa dera Dios! Hende  manera Hawking lo bini i lo bai; eksistensia di Altísimo no ta dependé di nan. Ta un asuntu di fe i di probabilidat filosófiko manera mil i un idea sientífiko! Pader Coyne, SJ,  e direktor di sentro di astronomia di Observatorio di Vaticano,  - e mes un gran astronomo,  físiko i alabes un hòmber di fe - a yega di bisa, basta tempu pasá, ku e no tin problema ku Hawking su konosementu di físika i su genialidat, pero ku riba area di teologia Hawking ta kuru kuru: “Ta ridíkulo pensa ku e tipo di teoria di kosmos aki por pone Dios un banda...”, Pader Coyne a komentá. ‘Stephen, God is not a boundary condition.” Ku otro palabra: “Dios no ta un konstrukshon teóriko óf  matemátiko! ”Ekolekuá!

(Bo sirbidó ta invitá tur lesadó pa skucha “Mangazina di Konosementu”, un programa tokante siensia i fe,  na Radio New Song 96.5 FM, tur djarason 19:00-20:00!)